如何通過日本酒店網頁訂房(廣東話版)

日本大部份酒店都有自己嘅網頁，而且好多都有提供網上訂房服務。由於唔需要支付訂房網佣金，有時酒店網頁訂房嘅價錢可能仲會平D。

同通過樂天網訂房一樣，通過酒店網頁訂房一般都唔需要即時付款，房租係check-in時(或者check-out時)以現金或信用卡(細規模嘅旅館可能唔收信用卡)支付。

因為酒店網頁嘅訂房系統各自設計，所以系統嘅介面以及使用亦都略有不同，不過訂房過程基本上都由以下幾個步驟組成：

(1) 選擇住宿計劃；
(2) 選擇房間類型、人數；
(3) 選擇check-in同check-out日期；
(4) 填寫住客資料；
(5) 確定訂房；
(6) 收到訂房confirmation。（將confirmation列印出黎，去到酒店交俾reception就可以辦理check-in手續）

以下用大阪Cross Hotel，介紹訂房過程。

(1) 登入大阪Cross Hotel網頁。


留意：

(i) Cross Hotel有提供中、英文網頁，如果唔想睇日文，可以click入中文或英文網頁訂房（訂房只提供英文）。同一個plan嘅價錢無論係日文定係英文都係相同架，不過日文網頁提供嘅某D plan係英文網頁可能唔會提供。所以我會用日文網頁訂房，貪佢多D選擇。

(ii) 訂房有兩種方法（英文網頁只得第二種方法），第一種係click入「STAY PLAN」，然後從住宿計劃一覽表中選擇；第二種係直接係主頁輸入住宿日期、天數、每間房人數等條件進行search。不過用第二種方法search出黎嘅結果，唔會包括所有plan，所以我會選擇先進入STAY PLAN。

(2) Click「STAY PLAN」，進入住宿計劃一覽表。如果兩個人入住，click「2名樣」分頁。然後click你選中嘅plan（假設你選擇左「日本初導入！NEWアメニティ[comfort zone]付き宿泊プラン」呢個plan）。 

 
(3) Click「予約詳細」。 

 
(4) 選擇房間類型，然後click「Go」按鈕（假設你選擇「コンフォート・ツイン【禁煙】」房（兩張床雙人房），兩個人入住）。 

 
(5) 空室狀況會以日曆顯示，如果確定有房，click住宿日期上嘅符號或租金數字進入訂房頁。 

 
(6) 輸入(a)住客嘅姓名（其中一位）、(b)預計check-in時間、(c)是否需要使用停車場（預設係唔需要），然後click「次へすすむ」按鈕。

留意：

Cross Hotel網頁訂房系統有個幾好嘅功能，就係可以係同一次訂房操作中，預訂唔同日子或者唔同類型嘅房。例如，如果你係1號住一晚，2號至4號去其他地方，5號再返去住多晚，如果係通過樂天網訂房，只可以分開兩次訂；又例如，如果有四個人入住，但又想訂兩間唔同類型嘅房，係Cross Hotel網頁嘅訂房系統亦可以一次攪掂。操作如下：

(i) 如果想訂多間完全相同條件（即係住宿日期、人數以及房間類型都相同）嘅房，可以click(d)「同條件..追加」按鈕；

(ii) 如果想訂多間條件唔同（例如住宿日期相同但房間類型唔同，或者住宿日期唔同）嘅房，可以click(e)「別條件..追加」按鈕；

(iii) 如果手多多加錯左，可以click(f)「..預約..取消」按鈕cancel多餘嘅房。

(7) 通過Cross Hotel網頁訂房唔一定需要登記為會員，不過登唔登記為會員都需要填寫相同嘅資料。如果已經係會員，只需輸入電話號碼(g)，以及密碼(h)，然後login(i)（如果唔記得密碼，可以輸入電話號碼以及電郵地址，按「送信」按鈕後系統會自動寄返個密碼俾你）。如果想登記為會員，按(j)上面個按鈕；如果唔想登記為會員，按(k) 上面個按鈕。 
  
(8) 填寫有※標誌嘅資料。

(l) 輸入姓名，應與passport相同，可以打中文或英文(葡文)；
(m) 輸入姓名嘅片假名，方便酒店人員讀出你姓名嘅發音（要留意，如果你個名有兩個字，咁兩個字嘅片假名之間唔可以有空格，例如“陳大文”中“大”字嘅片假名“ダー”與“文”字嘅片假名“ウェン”一定要連住打，即係“ダーウェン”；另外，要知自己個名嘅片假名，可以利用網頁http://dokochina.com/katakana.php，只需要輸入中文全名，click下個掣就可以翻譯成片假名架啦）；
(n) 選擇所在縣，只需將下拉式選單拉到最下，選擇“日本國外”就可以；
(o) 輸入電話號碼；
(p) 輸入電郵地址；
(q) 輸入多一次電郵地址；
(r) 選擇性別；
(s) 點選「利用規約に同意する」側邊嘅方格；
(t) 點擊「確認」按鈕。

(9) 確定無誤之後，可以按「予約」按鈕訂房，系統會即時自動send一封confirmation e-mail到你郵箱，check-in時出示e-mail就可以架啦。

取消訂房

 

如果想取消已確認嘅訂房，可以係上面Step (4)嘅頁面click左手邊導航欄嘅「My Page」，再按照下圖進行操作。

溫馨提示：如果訂房之後因事唔能夠入住，請一定要提前取消。