2008年秋季京阪神紅葉＋白浜溫泉之旅（第四天）III - 海舟：溫泉&晚飯

因為check-in時預約左8點先食晚餐，返到酒店仲有成三個鐘時間，唯有先係酒店內周圍行下浸下溫泉先。呢間酒店其中一個特色就係大堂有個地方，放左好多和服係度，有不同款式，住客可以隨便取來穿著，所以每浸完一次溫泉搵一次衫都冇問題架，我地都換左幾套，最後check-out時房入面就留低成房和服係度。

 
其實選擇住海舟，其中一個重要原因都係受佢既溫泉吸引，海舟總共有六個溫泉，包括一個室內男湯（入面其實又分為三個唔同既池，仲有一個桑拿房），一個室內女湯，三個露天貸切風呂（每個都對正大海，設計又各有特色，只要冇人用就可以免費包起自己浸晒），同埋一個超靚海景既男女混浴溫泉，全個白浜好似只此一個，不過浸果陣當然要有野遮掩重要部位啦。

 
咁多唔同既溫泉，要全部浸晒都花左唔少時間。以下係偷偷地影返黎既溫泉照片，有D係當晚浸時影，而有一D係第二朝浸時影架。

 
溫泉區入口

 
進入露天溫泉區既入口，因為行出室外，所以要換上拖鞋

  
每個貨切風呂出面都有個咁既牌，個牌黑色字“空.....”向外時表示冇人用緊，只需要將個牌返轉，令紅色字“只今使用中”向外就可以包房自己慢慢浸架啦，不過浸完走時記得再轉返個牌喎. . . . . . . . . . 

  
露天貨切風呂之一 - 石匠の湯

  
露天貨切風呂之二 - 岩戶の湯

  
露天貨切風呂之三 –梅香の湯

  
呢個就係全酒店最靚景既男女混浴露天風呂，叫做浜千鳥の湯，從外面都可以望到溫泉裡面架，不過有野遮住都唔怕俾人望到重要部位既

  
係男女混浴露天風呂浸溫泉需要用一塊布遮住重要部位，塊布可以係進入溫泉區既走廊度自取，進入男女混浴露天風呂前係更衣室圍上就可以架啦

  
呢個係休息室，浸完溫泉可以坐係度抖抖，除左有水飲之外，仲有綠茶味同牛奶味兩款雪條任食架，牛奶味果隻好好味

  
浸完溫泉又周圍行行睇睇之後，終於等到食飯時間啦，酒店既dinner時間分為兩更，分別係5:30同8: 00，當check-in時要選定。海舟既晚餐全部都係要去佢餐廳入面食架，冇得係房度進餐。

 
先來前菜，仲有杯好味梅酒.....

 

 
再來蟹肉豆腐湯

  
跟住係主菜新鮮魚生船，有好多種類架

  
之後仲有火鍋

 
仲跟埋飯添，不過已經好飽啦

  
餐晚飯整體黎講真係唔錯。食完飯返房抖抖，臨訓前又浸多次溫泉。可能第一次開咁長途車既關係，今晚訓得非常之林。