2007年東京公幹之旅（Day 1）

由於而家仲未有澳門直航日本東京嘅班機，所以只可以經香港飛去東京（不過就算有都唔一定夾得啱時間）。今次公司同我地買左下午3點幾嘅機票（點解唔買早D？），而且仲買埋中午12點半從澳門碼頭直去香港機場嘅機場噴射飛航船飛。

11點前到達碼頭，然後攪埋飛機check-in同行李寄倉，再係碼頭乾等個幾鐘，終於上得船。今次因為要提早買船飛，所以只可以買到頭等位，普通位俾旅行社hold住左，要等到船期10日前先會賣俾散客。

機場噴射飛航頭等位嘅早餐

 

由澳門坐船去香港機場只需要45分鐘，1點3就到左香港機場嘅海天碼頭，攞返HK$120機場稅退稅之後，就坐接駁巴士去候機大樓等上機。

下午3點35分飛機準時起飛，飛行時間大約3個半小時，去到日本成田空港大約係日本時間夜晚8點，不過成田空港真係好大，架飛機降落左之後行去停機位都足足行左10分鐘。

飛機上面

從飛機底部閉路電視影到地勤人員開始做嘢

8點15分落機之後，要再坐一段無人架駛小火車去入境大樓。去到見到好多人，而且外國人入境櫃位又少，D日本仔留返晒D櫃位俾自己人，我見D日本人一黎到好快就過左海關，而我地就排左成一個鐘先入到境。而且而家又要打手指模同埋影相，影相時好多人都唔識睇位，影得唔好又要再影過，我都影左兩次，而且有D機仲神神地，唔係咁work。出到去取行李時，D行李已經放晒係地下等人認領，搭咁多次飛機今次係第一次行李等人。

領取行李大堂

由於同事已經係網上book左一架七人車的士，所以一到接機大堂就有個司機接機，跟住出去坐車去酒店。由機場去到位於日本橋嘅酒店只需要一個鐘車程，不過去到都已經係夜晚10點45分。

酒店大堂

國泰D食物真係唔係好掂，唔好食份量又少，所以係酒店check-in完就出去附近食dinner醫肚先，不過因為唔係旺區，冇咩食店，最後入左去間拉麵店食拉麵。

東京第一餐就係呢度攪掂

麵店地方狹窄，只得十個坐位

麵店內煮湯嘅大鑊

我自己碗大大碗叉燒拉麵，好好味，都係700円

食完麵之後俾錢時，個煮麵師傅竟然同我講廣東話，原來係廣東人，我初時都已經覺得佢唔似日本仔，似係中國人，不過就估唔到佢講廣東話，好彩食麵果陣冇講佢壞話。
食完麵都差唔多12點，之後去左對面間ampm便利店掃左D飲品同小食，就返酒店沖涼訓覺啦。

我住果間酒店房

張床都算幾大

沖涼房

用電插座，有埋三腳方型插座，唔洗用自己嘅轉換器

呢間酒店係用鎖匙開門，唔係用磁卡，真係復古

由酒店望出去嘅景色（第二朝影）

沖完涼之後發現原來部電視係一部電腦黎架，可以作為電視同電腦兩用，仲可以有得免費上網添，咁正當然要試下先。

電腦鍵盤

部電腦仲有得打機