2011年秋日本北九州自駕遊 - Day 4 (Part 1)：九重夢大吊橋

今日會從湯布院前往熊本市，行車里程大約120公里，途中我地會前往兩個重要景點，一個係九重夢大吊橋，另一個係阿蘇火山，之後就會去到熊本市住宿。

 

今朝好彩早起身去浸溫泉，有機會睇到湯布院俾晨霧覆蓋嘅美景，只可惜冇帶相機係身影唔到相，詳細介紹可以睇返呢篇住@由布院温泉 朝霧のみえる宿 ゆふいん花由。

 

食早餐

 

因為今日行程路程唔短，所以食完早餐之後就check-out出發，第一站去九重夢大吊橋。

 

九重夢大吊橋座落係大分縣九重町嘅九醉溪上面，距離湯布院大約30公里，由湯布院行一小段高速公路，之後係大分自動車道九重IC離開高速公路之後，再轉行一般道路向山上行駛，大約40分左右就可以到達。

 

前往九重夢大吊橋嘅路有一段九曲十三彎

 

山路中段有呢個停車處，值得停係度欣賞一下九醉溪美景。

 

終於到達九重夢大吊橋，呢度果然係個好有人氣嘅景點，一早已經有好多旅遊車同私家車泊晒係度。

 

先買返張入場券

 

吊橋入口

 

九重夢大吊橋橫跨係九醉溪上，吊橋嘅東西兩邊都有入口，不過主要入口位於溪嘅西邊。

 

橋面唔係好闊，只夠兩個人通過，而且人多或者大風嘅時候都有D搖擺，感覺好正。

 

九重夢大吊橋旁邊嘅震動の滝瀑布

 

離開九重夢大吊橋之後我地向阿蘇火山進發。從九重夢大吊橋到阿蘇火山大約60公里，由於冇高速公路，行車時間需要個半鐘以上。

 

呢區屬於高原區，景色都幾特別。

 

經過一個鐘頭多D車程，終於黎到阿蘇火山山腳嘅阿蘇駅，如果坐火車，係呢度落車之後要再轉坐巴士上山。

 

尋日係湯布院B-Speak買左兩件蛋糕，一件尋日食左，留返一件今日係阿蘇駅出面食埋當午餐。

 

- Day 4 未完，待續 -