2013年清境、台北自由行 – Day 1 (Part 2)：再遊逢甲夜市
係酒店安頓好後，先到附近行一行。台中公園智選假日酒店距離台中火車站唔遠，步行10分鐘就到台中火車站附近嘅中正路一帶嘅商業購物區。
酒店附近嘅街道，建築物大部份都比較舊，街上亦唔算熱鬧。
係繼光街見到呢間食綿冰嘅舖頭，先入去食碗綿冰解解暑，不過味道同口感唔係好得。
中正路一帶係台中火車站附近嘅商業購物區，呢度比台中公園果邊熱鬧好多。
行行下係中山路同綠川東街交界見到有好多人排隊，原來係排隊買雪糕。咁多人排應該好好味。不過因為實在排隊嘅人太多，所以決定聽日係清境返台中之後先試。味道係唔係真係咁得？Day 2行程話你知。
呢間舖頭嘅名叫宮原眼科。
呢間嘢賣嘅主要都係鳳梨酥、太陽餅呢D台灣手信，不過包裝好攪嘢，但就冇得試食，都唔知好唔好味。不過因為俾佢D包裝吸引，都打算買返D黎做手信，但係因為聽日仲會返台中，所以決定到時先買。最好有冇買？味道得咁得？Day 2行程話你知。
係台中火車站附近行到黃昏時候，決定去逢甲夜市掃街。因為係台中坐公車用悠遊卡好著數，而且係台北亦都要用到佢，所以先去7-11買張悠遊卡。不過係7-11買嘅悠遊卡係特別版，要額外俾NT$100卡費，唔似係台北捷運站買悠遊卡咁可以退返按金。不過因為都冇打算cancel張卡，所以都冇咩所謂啦。
去逢甲夜市嘅公車車站係台中火車站前面，坐25路或者35路公車都可以，係逢甲大學站落車就係，因為晚間路上少車，所以車程只係大約半小時。
用悠遊卡係上車同落車果陣要各嘟一次卡，係台中市內如果短程可以免費，不過遠程都有平，我地由台中火車站去逢甲大學站都係NT$3。
因為係星期日關係，逢甲夜市嘅遊人明顯比上年黎果次多好多。
第一時間先買件大腸包小腸食先，好味
跟住繼續一路行、一路食、一路買......
行完夜市坐返車返酒店休息。返上酒店前係附近便利店買定小食，準備聽日係去清境嘅車上食，仲買左呢隻溫泉蛋，味道唔錯。
- Day 1 完 -
Related posts:
標籤： 2013年清境、台北自由行
0 個意見:
張貼留言
訂閱 張貼留言 [Atom]
<< 首頁