2013年日本關西、北陸賞櫻自駕遊 – Day 3：京都醍醐寺、平安神宮、仁和寺

京都係日本最多賞櫻地點嘅城市，如果係滿開期間，即使停留三、四日都唔嫌多。我們原本嘅planning係打算留係京都三日賞櫻，可惜關西櫻花提早左開，所以臨出發前改左行程，將留係京都嘅日數縮短到一日半。今日嘅行程重點選擇左三個較遲開花嘅京都櫻花名所，其他地方因為櫻花已經一早開晒，去都冇謂啦。

 

2013.4.7 | 雨、一時晴

 

朝早起身第一時間睇下窗外仲有冇落雨，發現天陰陰但雨又唔怕好大，總算比尋日好好多啦。係京都呢兩晚酒店都有包早餐，今日食左個和式早餐。

 

櫻花期間酒店大堂每日都會張貼京都主要櫻花名所嘅最新開花情況，不過同實際開花情況似乎有一D出入，下圖見到好多景點都貼左係滿開，但查實已經凋落得七七八八。

 

另外大堂內亦有提供一D有夜櫻嘅賞櫻地點嘅開放時間資訊。

 

食完早餐開車向第一個賞櫻名所醍醐寺進發，醍醐寺位於京都駅西邊，開車過去要大約半小時。

 

係前往醍醐寺路上嘅時候都仲唔係好大雨，不過一到步雨勢又大起黎，真係掃興。醍醐寺係京都名剎，不過寺院內外因為落雨關係變得一地泥濘。

 

原本以為呢度嘅櫻花開花期會較長，點知都係已經凋落得七七八八。

 

入寺內要買門票

 

寺內其實冇乜野睇，櫻花樹比寺外仲少。

 

離開醍醐寺我地開車返去京都市中心，目的地係另一個花期較遲嘅平安神宮，而係平安神宮附近，仲有岡崎疏水、蹴上インクライン呢D賞櫻名所，開車經過果陴順便都睇睇，不過花兒都已經凋落。

 

呢間係平安神宮附近嘅京都美術館，佢有個地下停車場，我地就將架車泊呢度，就算落起雨黎上車都冇咁狼狽。

 

美術館同平安神宮之間嘅公園入面嘅櫻花，似乎係今次旅程到呢刻為止睇到開得最靚嘅櫻花，咁好個天又唔再落雨，所以先黎個狂影。

 

上年都黎過平安神宮，當時因為太早仲未開花，所以冇入去裡面嘅神苑，今次雖然係倒返轉遲左，但係應該都仲有D花可以睇嘅。

 

平安神宮入面有人扮演古代人，同佢地影返張相先。

 

入神苑要買飛，大人每位600円。

 

雖然已經過左滿開，但係神苑入面嘅櫻花都仲幾OK。

 

行完平安神宮係時候要食中午飯，今餐去河原町間漁心壽司食。

 

食完午飯先係寺町通步行街行下，順便到藥房入貨。去關西如果要買藥品，推荐大家去呢間係寺町通上嘅藥房，佢嘅價格係大阪同京都黎講可以算得上係最平嘅一間，如果星期六黎，仲有9折優惠，超抵。

 

下午我地再去多一個櫻花名所 - 仁和寺。仁和寺嘅櫻花品種屬於較遲開花嘅御室櫻，所以就算其他地方嘅櫻花已經凋落，呢度嘅櫻花都只係開左5分。

 

先去到仁和寺停車場泊好架車

 

停車場旁邊有檔野賣櫻花盆栽

 

御室櫻比其他品種嘅櫻花樹矮一D，花係白色嘅，似乎冇粉紅色嘅黎得豔麗。不過因為呢度較遲開花，所以係我地今次係京都見到最靚櫻花嘅地方。

 

入去仁和寺果陣我地係從停車場旁邊嘅側門進入，走嘅時候專登從正門出去順便影個正門。

 

離開仁和寺返酒店嘅時候，我地專登兜去哲學之道，不過冇落車，因為呢度D櫻花又係凋落得七七八八，景色唔靚。

 

最後介紹下今晚食D乜，就係酒店對面近鐵京都駅入面呢間江戶川鰻魚飯專門店。

 

- Day 3 完 -