如何通過ToCoo Car Rental租車(廣東話版)

ToCoo租車網應該有唔少人幫襯過，咁多人用主要係因為佢租車嘅網頁係全英文，而且好多時價錢亦係最平。本文為大家介紹通過ToCoo租車網租車嘅步驟。

【Step 1】係網站主頁上嘅地圖中，選擇租車地區，例如：大阪(OSAKA)。

 

另外，亦可按租車公司選擇，或者按當時推出嘅特定優惠計劃選擇。

 

 

【Step 2】假設上步中按地區選擇，網頁會列出所選擇地區內可供租車嘅租車公司所有分店，然後可以選擇你想租車嘅租車公司，以及取車嘅分店，例如：日產租車店梅田(Umeda Maru Building)分店。

 

 

【Step 3】網頁會顯示所選擇嘅租車公司分店嘅資料，包括位置地圖、地址、營業時間，以及各級別車輛型號；租車費係按級別訂定，同一級別唔同型號嘅車輛租金相同，但係通過租車代理預約租車一般唔可以指定要邊隻型號。如果你所選擇嘅租車公司當時有特別promotion，會同時顯示出黎。係呢個例子中，日產從2010年3月1日至7月16日期間有個特價計劃。如果選擇特價計劃，可以click佢旁邊紅色嘅「Rental charge & Reservation」；如果選擇正常租車計劃，就click合適嘅車輛級別旁邊紅色嘅「Rental charge & Reservation」。

 

 

【Step 4】假設上步中選擇特價計劃，click旁邊紅色嘅「Rental charge & Reservation」後，會進入下圖嘅頁面。

 

(A) 選擇車輛級別；

(B) 選擇取車以及還車嘅日期和時間；

(C) 按「Simulate」計算租車費用。

 

假設租用P-1級別車輛（呢個級別通常只係日產March呢隻型號），租車期間係2010年6月1日至6月6日。Click「Simulate」後會列出Normal Price以及ToCoo! Price兩個租車費用。

Normal Price係指直接向租車公司租車，而且係冇任何優惠或折扣情況下嘅租車費用；而ToCoo! Price係指通過ToCoo租車嘅費用。

Rental charge係指已經包括法定強制保險，以及消費稅在內嘅租車費用，通常向任何租車公司或者網站租車所標示嘅租車費用都係已經包括強制保險以及消費稅。

Insurance係指免責保險，保費每日1,050円。法律並冇強制購買免責保險，但係通過ToCoo租車，佢會強制你選擇購買，不過去到取車時租車公司嘅職員一般都會再問你，由你決定買唔買嘅。雖然強制保險已經cover左發生意外時對人及對物嘅賠償，不過肇事司機仍然需要支付50,000円嘅墊底費；但係如果買左免責保險，就唔需要支付墊底費。不過要留意即使買埋免責保險，如果發生意外而令到架車要去修理，仍然需要支付租車公司Non-Operation Charge，賠償租車公司因為係修理期間租唔出架車而產生嘅營業損失。如果意外發生之後你可以自己開返架車去租車公司，Non-Operation Charge係20,000円，否則就要50,000円。

【Step 4a】假設上步中選擇正常租車計劃，咁click旁邊紅色嘅「Rental charge & Reservation」後，會進入下圖嘅頁面，同上圖版面有少少唔同，不過操作方法基本相同，先選擇租車期間，再選擇取車及還車日期，然後click「Simulate」計算租車費用。

 

 

【Step 5】Click「Time System」按鈕後，進入預約租車嘅表格頁面，按要求填寫各項資料後就完成預約租車手續架啦。

 

(a) 填寫取車及還車地點；（如果取車與還車地點位於同一縣內(北海道除外)，一般唔需要收附加費，但如果位於唔同縣就會有Drop Off Charge(異地還車附加費)，收費金額視乎距離以及租車公司而唔同。[查詢Drop Off Charge]）

(b) 選擇車輛級別，如果你只想要某一級別，可以唔填second hope；

(c) 填寫車輛數量；

(d) 填寫取車日期和時間；

(e) 填寫還車日期和時間；

(f) 填寫乘客數目；

(g) 如果需要嬰兒或兒童座椅，可以填寫數量（另外收費）；

(h) 任意保險(arbitrary insurance)/免責保險(immunity insurance)會強制選擇；

(i) 選擇是否需要GPS及CD Player（免費）；

(j) 選擇吸煙車或非吸煙車；

(k) 選擇是否需要雪胎、雪鏈或4WD設備（另外收費）；

 

(l) 填寫姓名；

(m) 填寫聯絡電話；

(n) 填寫住宿酒店嘅名稱和電話；

(o) 填寫電郵地址；

(p) 填寫駕駛執照嘅類型、編號、簽發地點（如果預約租車時未申請國際車牌，可以唔填寫駕駛執照編號，等出發前再用e-mail通知。）；

(q) 填寫信用卡資料（預約租車時租車公司並唔會碌你張卡，租車費用會係取車時收取，一般可以選擇用cash或者碌卡；不過如果預約租車之後失約又唔係規定時間前取消，咁租車公司可能會從信用卡中收你charge。）；

(r) 指出你嘅日語程度；

 

(s) 如果有特別要求可於預約時提出；

(t) 點選「I promise to comply to the following rules」以及「I accept conditions of Tocoo reservations as the followings」；

(u) Click「CONTINUE」按鈕進行預約。

 

由於通過ToCoo預約租車需要經人手處理，所以預約申請一般會係第二個工作日先透過e-mail回覆。收到e-mail回覆確認租車之後，只需要print張e-mail出黎，到租車店取車時向職員出示就可以架啦。

* * * * * * * * * * * * * * * * * * * *

 

取車時通常需要出示以下文件：

1. 確認租車的e-mail；

2. 護照正本；

3. 國際駕駛執照正本；

4. 本地駕駛執照正本；

5. 信用卡。

一般情況下租車公司職員只會問你要上述第1 – 3點文件，本地車牌以及信用卡（如果用cash找數）並唔需要，不過最好就帶定囉。

當租車預約確認之後，如果需要更改或取消，可以透過填寫ToCoo網頁內嘅預約取消及更改表格進行。如果係取車日嘅7日之前取消或更改，並唔需要收取費用，但7日之內就要按情況收費。

ToCoo網頁上基本上都有介紹租車手續以及提供各種相關資料：

預約步驟 (https://www2.tocoo.jp/?file=rentcar_inbound/reservation_steps)

常見問題 (https://www2.tocoo.jp/?file=rentcar_inbound/faq)

租車條款 (https://www2.tocoo.jp/?file=rentcar_inbound/terms_conditions)

保險 (https://www2.tocoo.jp/?file=rentcar_inbound/insurance_policy)

車輛介紹 (https://www2.tocoo.jp/?file=rentcar_inbound/mazda/car)

ToCoo嘅中文版網頁而家亦已經加入租車功能。不過中文版網頁並冇提供英文版網頁所提供嘅特價優惠。

如果覺得本文有用，請幫忙按一下底下的facebook或者google圖案，分享給其他人呀！