網上訂購澳門航空機票

出外旅遊，少不免要舟車勞頓，尤其是係澳門人，事關好多旅遊城市都冇澳門直航班機，想去呢D地方往往需要經香港坐飛機，轉船轉車相當辛苦。好彩最近幾年澳門航空開通嘅航線逐漸增多，對於我地呢D自由行客常去嘅泰國、台灣、韓國以及日本呢D熱門地方，基本上都有定期航班。

 

雖然澳門航空嘅服務質素一般，航班又少，而且食物亦麻麻，不過勝在由澳門起飛，可以省卻唔少時間以及轉船轉車嘅麻煩，而且回程時亦可以放心帶回食用期限很短嘅手信，例如日本嘅生果海鮮之類，所以，如果有得選擇，我會盡量係澳門飛架。

由澳門去台灣、泰國嘅航班都算幾多，而且有幾間航空公司競爭，所以票價都算合理，亦不時有優惠。但係日本、韓國嘅航線就唔同，以日本為例，現時由澳門去日本就只得澳門航空有機去，而且班次少(現時澳門飛日本只得逄星期一、三、五、六、日每日一班去大阪，以及由3月28日起逄星期二、四、日每日一班去東京)，所以一般好少會出現割價式嘅promotion。

* * * * * * * * * * * * * * * * * * * *

購買package還是自己訂購機票、酒店好呢？

好多人由澳門出發去日本自由行，都係通過旅行社購買package(澳航假期或者個別旅行社自己包裝嘅套票)，小弟第一、二次去關西都係咁做。不過如果細心計下條數，就會發覺購買呢類package，好多時都唔係太化算。

澳門航空嘅機票雖然好少有減價促銷，不過就有提前60日以及提前30日購票優惠。以日本大阪為例，提前60日購買嘅淨機票價係MOP1,999，而提前30日購買嘅淨機票價係MOP2,599。下面以澳航假期大阪Cross Hotel平日嘅3日2夜package為例分析一下係自己買機票、訂房平，定係買package平。

Package資料：MOP4,720/人，包括來回澳門大阪機票一張（不含燃油附加費及機場稅）+Cross Hotel 2晚semi-double房（佔半房，含早餐）。

首先，package裡面semi-double房（含早餐）平日每晚續住費係MOP1,970，如果自己上Cross Hotel Osaka網頁訂房，或者係樂天網訂，平日semi-double房（含早餐）最平嘅plan係7,000円/人，如果以日元兌港幣9.5嘅匯率計算，一間房每晚房租大約MOP1,370，比係package所定房價平MOP600。下面分別計算三種情況嘅價錢：

                   Package            提前30日購買機票            提前60日購買機票

機票                                               2,599                                    1,999

酒店                                               1,370                                    1,370

                     4,720                        3,969                                   3,369

可以睇到，如果選擇自己上網訂房，並且可以提前60日自己購買機票的話，比起購買package每人可以節省MOP1,300+，即使提前30日買機票，亦平MOP700+。

 

註：因為匯率波動，機票價格和Package價格經常調整，以上價格是2012年3月份的價格。
 

不過有一點需要留意嘅，提前60日或30日購票嘅優惠，並唔適用於聖誕、新年、復活節以及7月下旬至8月下旬呢D旅遊旺季。

 

2014年更新：而家澳門航空嘅提前購票優惠已經改為"提前90天"、"提前60天"、"提前30天"同"提前14天"。

 

當然，如果離出發日期唔夠15日，咁一定係買package平啦，除非撞啱有promotion。其實澳門航空有時都會有D專for某D大機構員工嘅promotion，或者係某D節日俾某類人士嘅promotion，票價同提前60日購買嘅票價相同。

 

2014年更新：今年澳門航空每季都會推出「旅遊季」特價機票限時促銷優惠，想買平機票記得留意每次嘅促銷期啦。

平一千幾百可能對有D人黎講唔係太重要，不過選擇唔買package而自己購買機票、酒店仲有另一個原因，就係行程可以比較有彈性。通常3日2夜pakcage裡面嘅酒店住宿，好多時要求係同一酒店連續入住兩晚(因為酒店連泊嘅房租平D)，所以可能會限制左計劃行程嘅靈活性。

* * * * * * * * * * * * * * * * * * * *

如何透過網上訂購澳門航空機票？

 

2014年更新：澳門航空的官網設計和網上訂票系統在今年中進行了更新，以下的網上購買機票流程已經不適用，請參考本Blog最新的教學文章《澳門航空(Air Macau)新版網站購買機票教學》。

 

小弟最近安排緊6月第三次日本關西之旅，由於時間充裕，所以選擇提前60日購買機票。而家趁仲記得將購票過程寫出來，方便自己日後再購票時remind，亦可以供有需要嘅朋友參考。

無論係提前60日或30日購票，都必須透過澳門航空網頁購買，以及使用信用卡付款，而機票則採用電子機票形式。

購票步驟如下：

1. 進入澳門航空網頁http://www.airmacau.com.mo/，Click主頁上移動中嘅“XX天預購”icon

 

 

2. Click『立即購買』

 

 

3. 選擇(1)出發地點、(2)目的地、(3)出發日期、(4)回程日期、(5)往返或單程、(6)客艙級別、(7)人數，然後Click『預訂航班』

 

 

4. 選擇出發航班、回程航班以及票價(如果離出發日期超過60日，會出現“提前60日訂票超低價優惠”)，然後拉到網頁最下面，Click『確認航班』

 

 

5. 出現“航班確認”畫面，除顯示你預訂的航班資料外，亦顯示包括機場稅和燃油附加費在內嘅實際機票價格，核對無誤後，拉到網頁最下面，Click『繼續』

 

 

6. 出現“乘客信息”畫面，輸入所有乘客嘅資料，以及電子郵件地址(電子機票會寄到此郵箱)，然後Click『繼續』

 

 

7. 出現“付款”畫面，核對無誤後，Click“我已經詳細閱讀並同意接受”左手邊方格，然後Click『繼續』

 

 

8. 出現“信用卡交易”畫面，輸入信用卡資料，然後Click『Pay』

 

9. 完成訂票，出現“確認”畫面，此時票價會即時從你提供嘅信用卡帳戶扣錢，同時，系統會寄上一封電子郵件到你電郵地址。電郵嘅資料相當簡單，只列出訂票電腦代號、每張機票嘅號碼、每名乘客嘅姓名、航班資料以及票價。出發時係航空公司櫃位出示呢封電郵，以及信用卡核實就OK架啦 (當然仲要有乘客passport啦)。