日本酒店推介 - 南紀白浜：景勝の宿 浜千鳥の湯 海舟(廣東話版)

每次當有朋友計劃去日本關西浸溫泉而問我邊間溫泉旅館好嘅時候，我都會推薦佢地以下要介紹嘅呢間：景勝の宿 浜千鳥の湯 海舟。

 

海舟係我係日本入住嘅第二間溫泉旅館，因為對佢嘅印象太好，所以之後每次入住其他溫泉旅館都會攞海舟黎做對比，但到而家仲未有一間我個人覺得可以比得上。當然，我唔係將佢同一D貴族級嘅溫泉旅館黎比較，因為小弟仲未有資格入住呢類旅館。

 

白浜位於關西和歌山縣南部太平洋沿岸，係日本其中一個著名嘅溫泉勝地。由於白浜係海邊城鎮，所以大部份溫泉旅館都係沿海岸而建，旅館嘅大部份房間以及溫泉都擁有無敵海景，可以嘗試到邊浸溫泉邊看海嘅寫意感受。

 

白浜擁有眾多溫泉旅館，質素好嘅數目亦唔少。小弟係08年第一次到白浜時，就係Yahoo Blog以及樂天網上留連左唔少時間，為嘅係希望搵到一間合心水嘅溫泉旅館。係眾多溫泉旅館之中，我地最後選擇左海舟。

 

海舟之所以能夠脫穎而出吸引我地，其中一個重要原因係由於佢嘅溫泉。溫泉嘅質素對於選擇溫泉旅館可以話係首要考慮因素，係白浜眾多溫泉旅館之中，海舟嘅溫泉的確相當吸引。海舟總共有六個溫泉，包括一個室內男湯（入面其實又分為三個唔同池，仲有一個桑拿房），一個室內女湯，三個露天貸切風呂（每個都對正大海，設計又各有特色，只要冇人用就可以免費包起自己浸晒，又或者與情侶一齊浸），同埋一個超靚海景既男女混浴溫泉，全個白浜好似只此一個，不過浸果陣當然會有布遮掩重要部位啦。

 

除左溫泉正之外，海舟嘅客房以及館內嘅裝修設計亦相當之靚，住係度真係感覺好舒服。

 

至於食物方面，係咁多評分項目之中得分最低嘅一項，網上亦有唔少人彈佢唔係太好食，不過亦有唔少人讚，而我本人就覺得幾OK，可能對食物嘅喜好人人唔同啦。

 

海舟係白浜屬於中高檔次嘅溫泉旅館，如果住日式房間，每人起碼要21,000円以上（兩人入住，包早餐及晚餐），但如果住洋式房間，每人大約都係16,000円左右（兩人入住，包早餐及晚餐）。

 

預訂海舟可以上佢地集團設立嘅訂房網hotespa.net預訂，但個人推薦通過樂天訂房網預訂，因為通過樂天訂房網訂房價錢一般會比hotespa.net平，而且通過樂天網訂房有1%積分回贈，比較著數，另外有時樂天網會推出樂天限定嘅優惠，所以，推薦使用樂天訂房網。

 

直接通過樂天網預訂景勝の宿 浜千鳥の湯 海舟 >> Click here

* * * * * * * * * * * * * * * * * * * *

酒店資料：

名稱：景勝の宿 浜千鳥の湯 海舟

地址：〒649-2211和歌山県西牟婁郡白浜町1698-1

電話：0739-82-2220

網址：http://www.hotespa.net/hotels/kaisyu/top.html

 

 

以下節錄左2008年秋季京阪神紅葉＋白浜溫泉之旅遊記中關於海舟嘅介紹：

海舟溫泉區入口

進入露天溫泉區嘅入口，因為行出室外，所以要換上拖鞋

每個貨切風呂出面都有個咁嘅牌，個牌黑色字“空.....”向外時表示冇人用緊，只需要將個牌返轉，令紅色字“只今使用中”向外就可以包房自己慢慢浸架啦，不過浸完走時記得再轉返個牌喎.....

露天貨切風呂之一 - 石匠の湯

露天貨切風呂之二 - 岩戶の湯

露天貨切風呂之三 –梅香の湯

呢個就係全酒店最靚景既男女混浴露天風呂，叫做浜千鳥の湯，從外面都可以望到溫泉裡面架，不過有野遮住都唔怕俾人望到重要部位既

係男女混浴露天風呂浸溫泉需要用一塊布遮住重要部位，塊布可以係進入溫泉區既走廊度自取，進入男女混浴露天風呂前係更衣室圍上就可以架啦

呢個係休息室，浸完溫泉可以坐係度抖抖，除左有水飲之外，仲有綠茶味同牛奶味兩款雪條任食架，牛奶味果隻好好味

酒店嘅dinner時間分為兩更，分別係5:30同8: 00，當check-in時要選定。海舟嘅晚餐全部都係要去佢餐廳入面食架，冇得係房度進餐。

先來前菜，仲有杯好味梅酒.....

再來蟹肉豆腐湯

跟住係主菜新鮮魚生船，有好多種類架

之後仲有火鍋

仲跟埋飯添，不過已經好飽啦