如何申請國際車牌（澳門限定）

想係日本自駕，首先需要申請返個國際車牌。因為小弟係澳門人，所以只可以介紹澳門申請國際車牌嘅手續，香港嘅情況，網上應該有唔少介紹，請香港朋友自己search啦。

 

澳門簽發國際車牌嘅部門係交通事務局，辦證地點位於澳門南灣大馬路762-804號中華廣場二樓交通事務局服務專區，辦公時間係星期一至五早上9時至下午6時（中午照常辦公），查詢電話：8866 6363。

(更新1：而家增設左馬交石交通事務局大樓地下服務專區，同埋北區政府綜合服務大樓兩個辦證地點。)

 

申請國際車牌嘅手續相當簡單，但申請人需要親自前往辦證地點辦理申請，並遞交以下資料：

1. 第043/DLC 號表格(可在交通事務局服務專區諮詢櫃檯索取或於交通事務局網頁下載)；

2. 有效身份證明文件清晰影印本1張；

3. 有效澳門駕駛執照清晰影印本1張；

4. 一吋半近照2張 (彩色白底)，相片規格可參考這裡。

註：申請時需要出示身份證及澳門駕駛執照正本。

為減少輛候時間，建議大家先用網上預約服務預約好辦證時間。

 

一般情況下，遞交申請表後第二個工作日就可以去返辦證地點領取國際車牌，可以搵人代領，但需要由申請人填寫及簽署一份代領駕駛文件聲明書。

(更新2：由2012年8月9日起，如果遞交嘅資料齊備，可以即是獲發國際車牌，預計一小時內便可領取(通常10分鐘之內已經可以取證)，不過只限中華廣場同馬交石服務專區呢兩個辦證地點。)

 

簽發國際車牌嘅費用係澳門幣3百元(今年已減至100元)，而國際車牌嘅有效期只得一年（不過如果你本身嘅車牌有效期少於一年，咁國際車牌嘅有效期只去到你本身車牌嘅有效期為止），所以當決定好自駕之後，唔好咁快申請住，可以等到臨出發一兩個星期前先去申請，咁做可能有機會用多一兩次，減少成本。如果租車公司要求提供國際車牌編號，一般可以係租車時唔提供，等到出發前先用e-mail補返。