日本自駕遊 – 計劃行程必備資料(廣東話版)

最近到日本自由行嘅人之中，越來越多人選擇自己揸車，我本人亦係其中一分子。其實對於地方細小嘅香港和澳門，尤其是係澳門人，可以自己開住駕車周圍去旅行的確好吸引。

係日本開車基本上都好安全，一般日本人開車都好禮讓，另外日本嘅馬路狀況比澳門好好多，行車方向與港澳相同，都係右軚車，交通規則亦大致相同，而且交通標誌都以漢字書寫，中國人一定睇得明。所以，如果你係澳門、香港揸車揸得掂，咁去到日本一定冇問題。

考慮係唔係選擇自駕最重要嘅決定因素係你嘅旅遊目的地，如果只停留係大都市內觀光，例如只係東京、大阪、京都等大城市，咁就唔需要自駕啦。日本大城市嘅鐵路與地下鐵網絡都好完善，基本上都可以好方便咁去到絕大部份旅遊景點，而城市嘅路面交通一般比較塞車，而且泊車收費較貴，搵停車位亦唔容易，所以如無必要，係大城市內最好乘坐公共交通工具，一來方便二來亦較自駕便宜。當然如果有其他原因，例如同行中有行動不便嘅老人家，咁可能就一定需要自駕囉。

如果旅遊目的地係大城市以外嘅地方，咁自駕會係較好嘅選擇，除非你冇車牌或者好討厭自己開車，又或者你希望感受乘坐長途火車或巴士嘅體驗。

日本嘅遠程交通費一般都較貴，當旅遊目的地係離開較遠嘅地方時，無論乘坐巴士或火車，車費都相當昂貴，如果同行有兩個人或以上，咁一般自己開車費用比較化算。

是否選擇自駕除左從交通費考慮之外，更多人會從旅遊樂趣黎考慮。自駕遊可以給予好大嘅自由自在感覺，體驗更多旅遊樂趣。而且自己開車唔會受公共交通工具嘅班次時間限制，唔需要擔心miss火車，唔需要搬運行李上車落車. . . . . .總之好處一大堆。正因如此，越來越多到日本自由行嘅人選擇自駕遊。

如果決定好自駕，咁出發前就要做好各項計劃和準備。計劃自駕遊時，需要進行嘅事前準備工作包括租車，申請國際車牌，了解GPS嘅使用，確定住宿地點、預計行車路線、行車距離和行車時間，收集目的地電話或mpa code等等。

租車、申請國際車牌、了解GPS嘅使用等問題已經係其他篇章中介紹，本篇介紹其餘方面嘅資料。
有關租車嘅介紹可參閱 >>

+ 日本租車公司

+ 如何通過日本樂天網租車

+ 如何通過日本豐田租車店預約租車

+ 如何通過日本萬士得租車店預約租車

+ 如何通過ToCoo Car Rental租車

+ 日本租車保險制度

有關申請國際車牌嘅介紹可參閱 >> 申請國際車牌（澳門限定）
有關使用GPS嘅介紹可參閱 >> 如何使用汽車衛星導航(GPS)

* * * * * * * * * * * * * * * * * * * *

確定住宿地點

 

自駕遊嘅其中一個原因，係因為計劃去嘅多個旅遊目的地之間有一定距離，所以自己揸車比較方便。所以，當計劃自駕遊行程時，第一個需要考慮嘅問題係點樣將各個目的地串聯起黎，以及決定係邊幾個地點留宿。

考慮點樣將各個目的地串聯起黎嘅重點，係盡量唔行回頭路；而決定每日住宿地點，就需要結合每日遊覽景點數目、遊覽時間以及行車距離和時間黎考慮，而其中行車距離和時間係一個重要嘅考慮因素。去日本自駕遊係為左享受旅遊同駕駛嘅樂趣，所以千其唔好自己攞苦黎辛，每日駕駛距離和時間一定要有上限，否則你嘅旅程重點只會變成駕駛，而非旅遊。

因為兩個住宿目的地之間嘅景點數目以及遊覽所需時間唔同，所以需要根據情況確定兩個住宿地點之間嘅合適距離，一般以150公里左右較合適，例如，由大阪到白浜以及由札幌到富良野嘅距離，大約就係150公里左右。如果以平均時速70公里計算，行車時間大約2至2.5小時，咁樣就可以有足夠時間遊覽景點。

 

* * * * * * * * * * * * * * * * * * * *

估計行車距離和時間

 

點樣知道兩地之間嘅距離以及行車時間呢？其實網上有好多工具可以幫助大家計算兩個地點之間嘅距離以及估計行車所需嘅時間，而我個人覺得最方便實用嘅就係Google Map。

毫無疑問，Google Map係現時最方便實用嘅網上地圖工具，相信好多人都有使用過。Google Map有多種語言介面，如果你電腦係中文windows，咁Google Map嘅操作介面應該就係中文。所以，Google Map使用起黎比採用日文介面嘅日本同類網站更適合我地使用。

1. 首先打開Google Map日本地圖(

http://maps.google.co.jp/)；
2. Click左邊面板左上角嘅「規劃路線」（如果左邊面板已經隱藏，可click “>>”顯示面板）；
3. 係以綠色圓圈A字標示嘅欄內輸入起點名稱（例如：cross hotel sapporo），再係以綠色圓圈B字標示嘅欄內輸入終點名稱（例如：富良野）。（如果因為地點名稱係日文無法輸入，又或者輸入後無法找到，可以將地圖放大拉到地點所在位置，然後click mouse右鍵設定起點或終點。）；
4. 係終點欄下面嘅選單中選擇「自行開車」，然後click「規劃路線」按鈕。

完成以上操作後，Google Map會計算最適合嘅幾條建議路線，並顯示第一條建議路線嘅資料。地圖上顯示嘅藍色線係行車路線，而左邊面板上會顯示路線嘅距離，以及預計行車時間，你可以將距離除以行車時間，計算出系統估計行車時間所假設嘅平均時速，然後根據自己開車速度以及其他因素評估自己可能嘅行車時間。

左邊面板上亦會顯示路線中主要轉彎位嘅地點，以及由一個轉彎位至下個轉彎位嘅距離。而最正嘅亦只有Google Map先有嘅功能就係Google Map上可以顯示主要轉彎位嘅街道實景。只要click面板上嘅相機icon，就會顯示Google Map街景，而且仲有箭咀指示轉彎方向，有指示又有實景睇，一定唔怕轉錯街口啦。(不過要留意街景相並唔係最新實景)

如果要顯示其他建議路線，可以係左邊面板上click要睇嘅路線就可以。

除左建議路線之外，你亦可以根據自己嘅情況調整行車路線，例如由Cross Hotel Sapporo去富良野之間，你可能會先到途中某D景點遊覽，如果想計算去埋呢D地方嘅總行車距離及時間，就需要自己對行車路線進行調整。

調整行車路線嘅操作好簡單，首先選定一條建議路線，然後將mouse移到你要脫離建議行車路線嘅地方。當mouse移近路線上時，會出現圓點以及“拖曳以變更路線”嘅字樣，此時你可以將路線任意拉去你想去嘅地點，再查看左邊面板上顯示嘅行車資料就可以。

除左Google Map之外，日本國內亦有多個具有類似功能嘅網頁，以下係其中兩個較多人使用嘅網頁：
NAVITIME http://www.navitime.co.jp/
北海道駕駛導航 http://northern-road.jp/navi/cht/index.htm

* * * * * * * * * * * * * * * * * * * *

高速公路

 

雖然日本嘅一般道路（國道、縣道、道道等）嘅路面狀況好好，不過呢D公路一般限速好低，就算係郊區，國道嘅最高時速都只有50公里，而係城鎮內更低至40公里。雖然日本人亦習慣係一般道路上超速，不過一般道路上不時有捉超速嘅行動，一不小心隨時會被抄牌罰款。

為免以高速行走一般道路被告超速，如果趕時間而唔想浪費太多時間係行車路上，可以考慮轉行高速公路（有料道路）。不過是否行高速公路有兩件事需要考慮，第一件事係要留意日本嘅高速公路並唔係全部都好似北海道果D咁闊咁好行，係山區嘅高速公路，由於地方所限好多時只有一條行車線，而且某D路段與對面線之間只用欄杆做間隔，另外隧道數量亦可能又多又長，以高速行駛對於平日唔係揸開車嘅司機會有一定壓力。第二件事係日本嘅高速公路收費唔平，例如由大阪去白浜約150公里路程，公路費就要超過4,100yen。

日本高速公路嘅收費有兩種方式，第一種係劃一收費，而第二種係分段按路程收費。如果採用劃一收費，係高速公路入口會有人收路費，離開該段收費公路時就唔需要再俾錢。如果採用分段按路程收費，咁當汽車從入口駛入高速公路時，需要係閘口（一般通道）取張飛仔（操作就好似入停車場咁。如果用ETC卡，行ETC通道就唔需要。），到離開高速公路時，出口會有工作人員收你張飛仔，然後計算收費。

計劃行程時，最好先確定旅程中需要行駛邊段高速公路，並且先check一下所需嘅路費。查詢日本高速公路收費可以使用以下兩個網站：
日本道路料金：

http://www.driveplaza.com/dp/SearchTop
西日本NEXCO：http://search.w-nexco.co.jp/
使用方法基本如下：
1. Click地圖上起點所在嘅縣，直至出現高速公路圖；
2. Click高速公路圖上出入口icon，設定出發IC與到著IC；
3. Click「檢索」按鈕。


高速公路上相隔一段距離會有休息站，係地圖上簡稱 SA，不過一般相隔好大段距離先會有一個休息站，所以出發前最好睇清楚邊度有SA，計劃好係邊度停車休息以及去廁所解決生理需要。

如果想先體驗一下行駛高速公路嘅感受，可以上去以下阪神高速嘅網站體驗下：
http://www.hanko-navi.jp/

* * * * * * * * * * * * * * * * * * * *

查詢map code

 

汽車上嘅GPS主要依靠輸入目的地電話號碼黎尋找目的地位置，並進行導航。另外，某D型號嘅GPS亦可以support使用地圖編碼(map code)黎尋找目的地位置。所以，出發前除左收集所有要去嘅目的地電話號碼之外，亦可收集埋map code。

既然用電話號碼已經可以尋找目的地位置，為何又需要收集埋map code呢？其實答案好簡單，因為電話號碼只係有安裝電話嘅建築物內先至有，對於建築物以外嘅地方，根本唔會有電話號碼可以俾你用黎輸入GPS確定位置，例如當你想去美瑛嘅“親子之木”時，單靠電話號碼你就冇辦法進行導航，因為“親子之木”只係曠野中嘅幾棵樹，何來電話號碼。

不過要提醒，並唔係所有型號嘅GPS都support map code，萬事得嘅車所安裝嘅GPS一般都唔support，而Toyota嘅車所安裝嘅GPS一般都可以support。

收集日本各地map code可以用以下網站：

http://guide2.e-mapcode.com/
使用方法基本如下：
進入網頁後，係右手邊Mapcode index欄可以根據唔同類別以及地區查詢map code。如果唔明日文講D乜，可以click網頁右上角嘅“English Here”譯成英文。


如果你想去嘅地方並唔係主要旅遊景點或重要地方，咁可能係上述網頁上會搵唔到map code。如果係咁可以用以下方法找出目的地嘅map code：
1. 進入Mapion網頁(http://www.mapion.co.jp/)；


2. 係網頁地圖中click目的地所在板塊，直至出現詳細地圖畫面；
3. 將地圖拉到目的地所在，令紅色十字標誌正好位於目的地上；


4. Click右上角嘅「地図URL」，跟住彈出嘅小視窗中間嘅數字就係紅色十字標誌所在位置嘅map code。

* * * * * * * * * * * * * * * * * * * *

入油

 

除左係鄉村冇乜人嘅地方有一D好細嘅自助入油站之後，一般城鎮嘅油站都由職員為你入油，亦有抹玻璃服務。所以，如果唔識自己入油，最好都係搵返有人service嘅油站。

唔同油站嘅價格一般都會略有不同，唔同地點亦可能有一定差異，價格以每公升汽油價格標示，會大大隻字顯示係油站出面，所以開車期間可以留意一下，見有特別平嘅可以入定先。如果你係一個有心機夾價嘅人，可以出發前上gogo.gs網睇定邊間油站平。

出租嘅汽車都係入標準油，去到油站同職員講聲「Regular」佢就知，其實就算唔講佢地都知會係入呢種油架啦。如果想入滿，可以同職員講「漫單」(廣州話發音)，即係full嘅意思。如果只係想入某個金額，咁直接將想入嘅銀碼嘅日元交俾佢亦可以。因為到還車時都要入滿油，所以，最簡單係每次入到油站都同職員講「Regular，漫單」或者「漫單，Regular」。

 

* * * * * * * * * * * * * * * * * * * *

取車與還車

 

當係網上預約好租車後，只需帶住封confirmation郵件依時去到約好嘅租車店，就可以取車。取車時通常需要出示以下文件：
1. 確認租車嘅e-mail；
2. 護照正本；
3. 國際駕駛執照正本；
4. 本地駕駛執照正本；
5. 信用卡。

 

一般情況下租車公司職員只會問你要上述第1 – 3點文件，本地車牌以及信用卡（如果用cash找數）並唔需要，不過最好就帶定去。

取車前職員會影印你嘅護照與國際駕駛執照，然後係份租車合約上填寫你嘅資料，再問埋你買唔買埋免責保險，跟得足D嘅亦會同你講解一下條款以及注意事項，之後會俾份租車合約你過目及簽名。然後就係俾錢時間，全部租車收費會係取車時一次過收晒。

俾錢之後，職員會帶你去睇車，你可以先check下架車，主要係睇下車身周圍有冇撞過或者劃花，發現有任何徵狀就叫個職員mark低。除左check車身有冇表面傷痕之外，有時間最好check埋以下方面：
- 車廂內有冇破損情況；
- 車胎夠唔夠氣以及有冇異樣；
- 車頭燈work唔work；
- 水撥work唔work（而家好多車嘅水撥都係自動感應，所以人手唔知可唔可以check到）；
- 汽車車鎖(防盜)work唔work。

 

確定架車冇問題之後，職員一般會問你識唔識用GPS，如果唔識佢會教你一次，不過有D租車店職員唔會主動問你，所以如果佢冇問你又唔識用，可以主動叫佢示範一次。

另外，由於所租嘅車輛通常唔係我地自己平時揸開嘅型號，所以有時間可以問埋佢車內設備嘅操作，例如電動門點開關，車尾門或車尾箱點開關，以及點樣收起後排座位變成放置行李嘅空間等等。

一切OK之後，職員會將一本file夾交俾你，裡面有租車合約副本、注意事項、緊急事故處理指南以及求助資料，亦可能有埋GPS系統嘅詳細使用手冊。至此取車程序完成，可以開車走人。一般由到達租車店到開車離開大約需時半小時。

至於還車方面基本上冇咩問題需要特別提醒，不過由於租車係以日租計算，所以預約租車時最後還車日嘅還車時間應該盡量set得晏D，咁做可以預鬆D時間，而且即使當日你提早還車，亦唔會有問題。

還車前一定要去到租車店附近嘅油站入滿油，取車時職員會俾定一張有最近油站嘅資料你。如果想慳D錢，可以係郊區入定一次油，因為一般市區內嘅油費會較貴，如果之前入左一次，咁還車前入果次油就冇咁多。

 

* * * * * * * * * * * * * * * * * * * *

北海道自駕遊小冊子

 

北海道係最多外國人到日本自駕遊嘅地方，官方亦為外國遊客製作左一D介紹自駕遊嘅小冊子，以下係其中兩本。
Fly & Active Drive Hokkaido(中文版)
開車遊覽北海道掌握開車完全手冊(中文版)

如果覺得本文有用，請幫忙按一下底下的facebook或者google圖案，分享給其他人呀！