旅遊教室: 預訂日本酒店 – 選擇酒店、住宿計劃與格價(廣東話版)

幾年前開始到日本自由行嘅時候，因為唔識門路，怕麻煩又擔心自己攪唔掂，所以都係到旅行社買package，順便透過旅行社訂埋其餘酒店。不過經過幾次之後，慢慢有返小小經驗同信心，而家酒店都會自己上網訂，已經好少幫襯旅行社啦。

其實日本酒店嘅網上訂房服務已經非常完善，手續亦相當簡單，即使係第一次都絕對應付得來架。

同透過旅行社訂房比較，我覺得自己上網訂房最少有以下四個好處：

第一，房價比旅行社收嘅價錢起碼平10%。

第二，酒店選擇多，可以揾到好多價錢平水準又高但旅行社唔會提供嘅酒店。

第三，唔洗俾旅行社拖住鼻子走；透過旅行社訂房，職員通常會同你講要幾日時間confirm，而往往要你打電話去三催四請之後佢地先會覆你有冇房，但其實有冇房一般即時就知，旅行社拖住你通常係因為佢地hold起D房，等到自己旅行團唔需要時先俾你，所以係旺季時透過旅行社往往訂唔到心水酒店，而且俾佢一味拖住都好煩惱；相返，如果自己上網訂房，可以即時知道有冇房，訂房之後會即時收到confirmation，唔洗再受旅行社氣。

第四，透過旅行社訂房，需要先付訂金，再係confirm有房之後支付全數房租，所以confirm之後想改都改唔到；而透過網上預訂日本酒店一般並唔需要即時付款，唔需要使用信用卡，房租係入住嘅時候先用現金找數，所以訂房時可以放心好多，唔怕訂左之後改變主意時冇得改。

如果訂完房之後行程有改動，又或者睇見有另一間更好嘅酒店，大可以取消原先預訂嘅酒店，重新再訂。一般係訂房網頁或者收到嘅confirmation裡面會寫明更改或取消預訂嘅收費，通常入住日期嘅3日之前取消訂房並唔收費，3日之內就要視乎離入住日遠近收取不同罰金，由房租20%至100%不等。好明顯呢D罰金係針對守規矩嘅日本本地人而定，因為訂房時並唔需要提供信用卡資料，所以即使要罰，外國人都冇辦法俾到錢架。不過都要提醒大家唔好因為咁就亂黎啊，如果真係唔入住，記得提前通知，我就通常會係確定唔入住之後即時通知，費事耐左自己唔記得啦。

通知取消預訂嘅方法，視乎你訂房嘅途徑，如果係透過樂天或者Jalan網訂房，可以去返網頁取消；如果係酒店自己網頁訂，咁就要睇佢網頁上有冇可以透過登入網頁取消預訂嘅功能，如果有就可以係網頁內取消，如果冇就要send email去通知取消；如果只係透過email訂房，咁取消當然亦只得用email啦。

* * * * * * * * * * * * * * * * * * * *

其實網上都已經有好多介紹日本訂房嘅文章，不過因為最近啱啱攪完下次日本之旅嘅全部訂房工作，所以想趁仲記得將過程詳細寫出黎，方便自己下次再訂房時唔記得都可以再睇返，亦好等有需要嘅朋友多一個參考。

透過網上預訂日本酒店，通常有三種方法：第一，係直接上酒店網頁訂房，第二，係通過訂房網(例如樂天或者Jalan網)訂房，第三，係直接寄email去酒店訂房。

第三種方法通常係用黎預訂一D民宿或者小本經營嘅旅館仔。係日本有唔少民宿，尤其是係北海道，好多人都鐘意入住富良野、美瑛嘅民宿，不過因為佢地係小本經營，架設唔起附有網上訂房功能嘅網頁，而如果同訂房網合作，又要俾差價(佣金)，對於小本經營唔合化算，所以一般訂房網都較少有民宿訂。所以想訂呢類型住宿房間，唯一可用嘅網上訂房方法係直接寄email去訂房，然後等佢回覆email黎confirm。

至於一般嘅酒店、旅館，大部份都可以有上述嘅第一、二種訂房方法可以選擇，即係可以直接上酒店網頁訂，又或者係訂房網訂。選擇邊種方法當然就只得一個標準，咪就係睇價錢囉，即係邊度平就係邊度訂。

一般黎講，一D高級酒店可能係因為唔想自己做sale房嘅工作，所以係酒店網頁提供嘅房租比起訂房網會貴好多；但係中低檔嘅酒店就唔同，因為唔洗俾訂房網佣金，所以酒店網頁提供嘅房租有時可能比訂房網仲平，所以訂房之前格價好重要。

* * * * * * * * * * * * * * * * * * * *

透過網上訂房一般需要經過以下四個步驟：

Step 1 – 選擇酒店；
Step 2 – 選擇住宿計劃；
Step 3 – 格價，確定係邊度訂房；
Step 4 – 訂房。

本篇先介紹Step 1至 Step 3，而Step 4正式訂房嘅步驟，會另外用幾篇文章詳細介紹。

* * * * * * * * * * * * * * * * * * * *

Step 1 – 選擇酒店

選擇酒店有多種唔同方法，例如參考去過嘅朋友所推介佢地住過嘅酒店、旅遊書嘅推介、酒店嘅廣告，又或者係討論區或者Blog入面參考網友介紹嘅酒店等等。如果未能從呢D渠道確定想住邊間酒店，大可以嘗試上訂房網搵下心水酒店，我通常係用呢個方法搵合適嘅酒店。

日本嘅訂房網可以按地區或其他唔同方式搜尋酒店，提供酒店嘅數量極多，實有一間啱心水，而且最有用嘅地方係佢提供每間酒店嘅住客評分，一般根據評分黎搵酒店質素點都有返D保證。以下就step by step介紹下點樣係訂房網上選擇合心水酒店：

(1) 進入樂天訂房網(或者Jalan，我比較多用樂天，以下以樂天為例作介紹)。

(2) 係網頁中間嘅地圖內click計劃住宿嘅地區，例如：近畿。(其實網頁內提供幾種唔同嘅搜尋方法，呢度只介紹最常用嘅方法)

(3) 之後網頁會顯示按縣劃分嘅近畿地圖，係地圖上click計劃住宿嘅縣，例如：大阪府；另外，如果只係想搵溫泉區內嘅溫泉旅館，亦可以click地圖上面嘅溫泉icon。

(4) 之後網頁會顯示所選擇嘅縣地圖(大阪府)，係地圖上(或上面的列表)再click計劃住宿嘅次一級行政區，例如：大阪府市內。

(5) 之後網頁會顯示所選擇嘅次一級行政區地圖(大阪市內)，係地圖上(或上面嘅列表)再click計劃住宿嘅區，例如：心斎橋・なんば・天王寺・市内南部。(地圖層次嘅多少視乎唔同地方而唔同)

(6) 之後網頁會顯該區內樂天網有提供訂房嘅所有酒店清單。網頁預設顯示所有酒店(A)，並按網站推薦嘅次序排序(B)，但亦可選擇按價格由低至高(C)，或由高至低(D)排序，網頁內顯示嘅件數係酒店數目(E)，本例中共分4頁顯示，可以click“次の30件”(F)查看下頁，或直接click頁碼跳至該頁。

如果click(G)下嘅分頁可以顯示評分較高嘅高級酒店。

(7) 搜尋結果會顯示所選擇區域內所有酒店清單，如果只係想搵指定日期有房嘅酒店，可以先設定入住日期、退房日期、人數同房數，然後再按條件搜尋。

上圖中英文字母標示嘅意思如下：
(A) 入住日期(チェックイン)
(B) 退房日期(チェックアウト)
(C) 房租上下限
(D) 一間房住宿人數(1部屋あたりのご利用人数)；如果有小朋友要分開填。
(E) 房間數目(ご利用部屋数)
* 訂房網有一個問題，就係冇辦法訂2間或幾間唔同類型嘅房，只可以訂相同類型，例如，如果有4個人想訂兩間房，咁只可以訂兩間同類型嘅房(仲要係相同嘅plan)，如果想要一間double同一間twin房係冇辦法做到架，係咁嘅情況下需要分兩次黎訂(每間房入住人要寫唔同人)。
(F) 房間條件：Single(シングル) / Semi-double(セミダブル) / Double(ダブル) / Twin(ツイン) / Triple(トリプル) / 和室 / 和洋室
* 有D酒店Single同Semi-double係同一類房，例如Cross Hotel
(G) 按每間酒店顯示，即係同一間酒店唔同住宿計劃(plan)顯示係同一酒店名稱之下。
(H) 按每種住宿計劃(plan)顯示，即不同plan單獨顯示。
(I) 按唔同條件嘅次序排到，分別係：按推薦次序、按價格由低至高、按價格由高至低、按評分高低、按房間面積。

* 樂天網比Jalan好用嘅地方，係佢會係酒店清單內直接顯示住客評分，而Jalan就需要click入去酒店資料之後先會顯示評分，冇咁方便。住客評分最高係5分，分別就服務(サービス)、位置(立地)、房間(部屋)、設施(設備・アメニティ)、溫泉/浴室(風呂)、餐飲(食事)六個項目進行評分，酒店清單顯示嘅係平均得分。

(8) 搜尋結果出現之後可以根據自己嘅需要排序，我通常嘅做法係先按價格由低至高(料金が安い順)排序(冇錢係要睇餸食飯架啦)，然後只考慮達到某個評分(例如4分)以上嘅酒店。如果價錢唔係你嘅考慮因素，咁大可以按評分排序，只考慮評價高嘅酒店。以下以大阪Cross Hotel為例，說明搜尋結果嘅酒店清單內顯示嘅信息。

(A) 酒店名稱，click入去可以進入酒店詳細資料。
(B) 住客平均評分，“お客さまの声（241件）”表示有241位住客評分，越多人評分一般表示間酒店越熱門，評分結果亦較客觀；click條link可以查看詳細評分資料。
(C) 酒店地址以及前往酒店嘅交通資訊，對於市區內嘅酒店，離地鐵站路程遠近往往係重要嘅考慮；如果想更加準確知道酒店位置，可以click隔離個icon顯示地圖。

(D) 酒店停車場資料，可以睇到有冇免費(無料)停車場、收費(有料)停車場嘅收費、車位數、進出停車場嘅時間限制。(“有：1,200円/１泊時間：当日14：00～翌日12：00※深夜12時～早朝6時までは出入庫不可”表示停車場要收費，住宿一晚收1,200円，可以由當日14:00泊到翌日12:00，但午夜12:00至朝早6:00唔可以出入)
(E) 清單內只會顯示3種住宿計劃(plan)，而且只顯示一D基本資料，例如房間類型、面積、床size、有冇廁所、包唔包早餐同晚餐等等，想睇詳細資料可以click個plan條link；如果覺得啱可以直接click紅色個“予約”icon進行訂房；如果想睇多D唔同嘅plan，可以click酒店名進入酒店詳細資料，或者直接click下面嘅“予約可能な宿泊プランをすべて見る”link顯示所有plan。
(F) 日本酒店房租一般以每人計算，“人數合計”果個金額先係一間房嘅租金；“通常料金”係指直接向酒店訂房嘅租金，“樂天料金”係指經樂天訂房嘅租金，如果“通常料金”冇show任何嘢，咁一般表示樂天個價唔會平得過直接向酒店訂房個價，可能相同，但更大可能係仲貴D。
(G) 呢度顯示可以取得嘅樂天點數，點數一般等於房租嘅1%，有時會高D，最高好似有10%(通常係D高價房)；樂天點數會係入住之後先計入你account，可以係下次訂房時使用，1分=1円，所以實際房價係所付房價嘅九九折。
(H) 結帳方式，オンラインカード決済=網上信用卡付款 / 現地決済=現場結算(即係入住時以現金支付)。

(9) 從清單內初步選擇覺得合心水嘅酒店之後，可以click入去再睇detail資料。下圖係大阪Cross Hotel嘅詳細資料，可以click唔同嘅分頁去睇唔同資料，但要留意每間酒店嘅版面同資料嘅詳細程度並唔同，有D比較小型嘅旅館只提供有限嘅資料。

(10) 係選擇酒店嘅階段我認為最主要係先睇下住客嘅詳細評分，前面講過住客評分分別對服務(サービス)、位置(立地)、房間(部屋)、設施(設備・アメニティ)、溫泉/浴室(風呂)、餐飲(食事)六個項目進行評分，所以只係睇平均分並唔全面，應該根據住宿需要以及個人偏好選擇自己認為重要嘅評分項目得分高嘅酒店，至於一D唔重要嘅項目，即使得分低D亦冇乜所謂。例如，如果你唔打算係酒店用餐，咁就唔洗理佢餐飲項目嘅分數，如果係入住溫泉旅館，咁可能風呂項目嘅評分就好重要，而我就比較注重房間質素，所以通常只會考慮部屋項得分唔少於4.5分嘅酒店。

(11) 住客評分始終係人地嘅評價，自己嘅feeling先係最重要，所以睇完評分之後，一定要睇埋酒店房間、設施以及溫泉(如果係溫泉旅館)嘅照片，睇下啱唔啱自己要求。雖然有時影出黎嘅樣會同實際有一段差距，不過據我經驗好多時評分高嘅酒店，網頁相片同真實會好接近，唯一會有差距嘅可能係空間感，因為大多數相片係用超廣角鏡影，睇落間房會比實際空間大一D。

(12) 日本酒店大部份都有自己網頁，係樂天網睇完覺得間酒店都OK之後，最好上埋酒店網頁再睇多D資料印證一下。但係樂天網並唔會提供酒店網址，所以需要自己search。其實要搵返酒店網址都好簡單，只需要係google用酒店名search，通常都可以搵到。

(13) 選擇酒店階段嘅最後一步，係嘗試係網上(例如yahoo blog)搵下有冇網友住過，如果有，可以睇下佢地自己影出黎嘅真實相片，同埋睇下佢地嘅評價。如果一切都OK，咁選擇酒店嘅工作算係完成。

* * * * * * * * * * * * * * * * * * * *

Step 2 – 選擇住宿計劃

好多地方嘅酒店訂房都好簡單，只要搵啱邊間酒店，決定要咩類型房間，就可以訂。但係日本就麻煩好多，日本人好鐘意攪“花臣”，訂房亦唔例外。係日本就算你已經決定好住邊間酒店同埋住咩類型房間，都唔可以就咁訂，因為日本酒店會將出租房間包裝成唔同嘅“住宿計劃(plan)”，即使同一類型嘅房間係同一日入住，唔同plan嘅房租都可能會相差好遠。

住宿計劃可以根據唔同標準或者唔同理由而組成，最簡單嘅係根據淡旺季設置唔同價錢嘅plan，或者根據有冇包早餐設定唔同plan等等。但更多嘅係根據其他比較複雜嘅條件或理由而設置嘅plan，常見嘅有專for夫婦、情侶或者女士入住嘅plan，遲check-in早check-out嘅plan，酒店成立週年紀念plan，慶祝某D節日、喜慶或者大型活動嘅plan，連續住宿嘅plan，甚至贈送特別紀念品嘅plan等等。唔同酒店plan嘅設計同數量會唔同，有D可能好少好簡單，但係有D可能會好多好複雜。下面就係大阪Cross Hotel嘅plan，有超過二十種，真係五花百門，令人眼花撩亂。

對於溫泉旅館，住宿計劃主要根據房間類型同晚餐食物嘅唔同黎設計，另外亦會加入其他要素，例如加入SPA或者岩盤浴等服務，變化可以好多，所以溫泉旅館嘅plan好多時比一般酒店仲要多。

一般黎講，住宿計劃都會有時間限制，長嘅可能全年有效，短嘅可能只係某一兩個星期嘅特別日子有效。

而唔同plan推出嘅時間亦唔同，長期有效嘅plan任何時間都可以訂，但有D專for特別日子嘅plan可能要到好後期先會推出。而一般嘅plan多數係開始前一個月左右推出，多數有效期三個月左右，所以一般係入住兩個月前就已經有不同plan可以選擇。

係呢個Step令人最頭痛嘅係，同一段日子裡面可能會有幾種唔同嘅plan，而對於入住嘅人黎講，唔同plan嘅基本內容都能夠符合住宿需要，但唔同plan有各自唔同嘅附加內容，所以價錢唔同，例如Plan 1嘅內容係一間Semi-double房，兩人入住，唔包早餐，另外提供幾個景點入場券；而Plan 2嘅內容亦係一間Semi-double房，兩人入住，但就包早餐；等等。

所以，訂房之前一定要詳細睇晒所有plan嘅內容，睇下邊隻適合自己同埋計落著數D。一般黎講，每一隻plan都會顯示房間嘅基本條件，而呢D基本條件亦係考慮選擇邊隻plan嘅最重要因素，所以以下幾樣嘢係選擇plan時一定要留心睇清楚：

第一，房間類型；房間類型一般包括：シングル[單人房(Single)]、セミダブル[一張小型大床嘅雙人房(Semi-double)]、ダブル[一張大床嘅雙人房(Double)]、ツイン[兩張床嘅雙人房(Twin)]、トリプル[三人房(Triple)]。如果你想住Twin，訂錯左Semi-double就大件事啦。

第二，床嘅size；例如：ベッド幅150ｃｍ，即係張床闊度係150cm。

第三，房既大細；例如20平米，即係20平方米，大約210呎；日本酒店一般都好細，但基本上都應該有15平方米以上。

第四，包唔包早餐，“なし”=沒有，“朝食なし”=唔包早餐。

第五，價錢。

呢個Step令人覺得煩惱嘅原因，除左係有D酒店plan嘅數目太多之外，主要可能係因為日文問題。不過好彩而家有好多網上翻譯網頁，只要將成段日文copy落去就可以翻譯成為中文。雖然譯出黎嘅中文唔係咁通順，不過只要能夠大致明白佢意思就得啦。以下係好多人用嘅excite翻譯網頁，只要將日文copy入左邊方格，選擇「日->中」再按翻譯就OK架啦。

以下係訂房時常見嘅日文用語嘅中文意思：

宿泊 = 住宿
部屋 = 房間
料金 = 費用
有料 = 收費
無料 = 免費
領収書 = 收據
消費税込 = 包含消費稅
予約番号 = 訂房編號
一泊 = 一晚
一泊二食 = 一晚住宿連早餐及晚餐
連泊 = 連續住宿
朝食 = 早餐
夕食 = 晚餐
朝食付 / 夕食付 = 包早餐 / 包晚餐
風呂 = 溫泉/浴室
食事 = 餐飲
チェックイン = 登記/入住(時間)
チェックアウト = 退房(時間)
シングル = 單人房(Single)
セミダブル = 一張小型大床嘅雙人房(Semi-double)
ダブル = 一張大床嘅雙人房(Double)
ツイン = 兩張床嘅雙人房(Twin)
トリプル = 三人房(Triple)
決済 = 結算
オンラインカード決済 = 網上信用卡付款
現地決済 = 現場結帳
ご到着予定時刻 = 預計到達時間
朝食あり = 有包早餐
朝食なし = 不包早餐
夕食あり = 有包晚餐
夕食なし = 不包晚餐
禁煙ルーム = 禁煙房間
喫煙ルーム = 吸煙房間
お部屋の広さ = 房間面積
ベッド幅 = 睡床闊度
バス・トイレ付 = 房內附有廁所、浴室
露天風呂付き客室 = 房內附有露天溫泉的客房
選択可 = 可以選擇
レストラン = 餐廳
テレビ = 電視
インターネット接続 = 互聯網
冷蔵庫 = 雪櫃
スリッパ = 拖鞋
バスタオル = 治巾
タオル = 毛巾
シャワーキャップ = 浴帽
カミソリ = 剃刀
ブラシ = 牙刷
ハミガキセット = 牙膏
ボディーソープ = 沐浴露
シャンプー = 洗頭水
リンス = 護髮素
ドライヤー = 吹風機
アイロン = 熨斗
貸出 = 借用

* * * * * * * * * * * * * * * * * * * *

Step 3 – 格價

如果酒店網頁亦有提供訂房服務，咁最好對比一下酒店網同樂天網兩者嘅價錢，有時酒店網頁提供嘅房租可能比訂房網嘅仲平架，但係如何你嫌麻煩又覺得就算差少少都無乜所謂的話，咁大可以跳過呢一步，直接係樂天網訂。

除左同酒店網頁比較之外，有人亦會係唔同訂房網之間作比較，例如比較樂天同Jalan嘅價格，好多時唔同訂房網之間都會有差別架。

格價時需要留意幾樣嘢，第一要留意比較緊嘅價錢係唔係同一個plan，訂房網嘅plan都係酒店提供，所以一般同酒店網頁內嘅相同，不過有時表述嘅字眼可能會有少少分別；第二要留意雖然有D酒店有英文網頁，亦可能係英文網頁提供訂房服務，但係由於英文網頁並唔會好似日文網頁提供唔同種類嘅plan，所以房租一般比較貴。第三要留意plan上嘅價錢唔一定就係入住果日嘅真正價錢，可能需要click多幾下去到訂房頁先會顯示到實際房價。

經過以上三個步驟決定好住邊間酒店、選擇邊隻Plan以及係訂房網定酒店網訂房之後，最後一步就到正式訂房。

* * * * * * * * * * * * * * * * * * * *

訂房步驟請參閱以下文章：

【通過樂天網預訂日本酒店】
【通過Jalan網預訂日本酒店】
【通過日本酒店網頁訂房】