旅遊教室: 2007年吉隆坡公幹之旅（Day 1

五日吉隆坡公幹終於完滿結束啦，星期三晚8點半終於安全返抵家門，祖先保佑。

今次出門主要係去公幹，所以只係趁住唔洗開會嘅空檔時間周圍行下街、食下野同埋睇下景。

上星期六（本來放假可以訓晏D，點知要去公幹，又冇OT收，慘！

），晨咁早就出門坐的士去港澳碼頭（呢程車費冇得claim返

，用左成40蚊），去到碼頭當然係print返張香港入境紙先啦（去果程因為直去機場禁區，唔洗入境，所以張入境紙係留返由吉隆坡飛返香港果陣用），跟住去碼頭二樓出境大堂度嘅機場TurboJet櫃位辦理登機手續同埋行李托運（好似只有Cathay先可以係澳門碼頭預辦登機手續，不過要俾$20手續費）。

澳門港澳碼頭二樓新開嘅噴射飛航機場快線登記櫃位

Check-in完都只係9點左右，係碼頭坐左一個鐘，等到10點鐘終於可以坐TurbotJet去香港機場碼頭，10點9左右就到左香港嘅機場碼頭啦。因為已經攪掂登機手續，所以落左船直接去排隊攞返HK$120機場稅退稅，跟住排隊坐去候機大樓嘅接駁巴士。

香港赤立角機場碼頭至候機大樓嘅接駁巴士

係機場等到12點3，終於上得機啦，12點9都算準時起飛，大公司果然冇delay。

國泰A340空中巴士

坐國泰長途機有戲可以睇，所以第一時間睇下有咩新片先。原來有哈利波特-鳳凰會的密令、變形金剛、虎膽龍威4.0.....，不過都睇過晒。好彩回程果陣有套嚟多件衰鬼上帝未睇過，等回程果陣睇下先。之前上網聽人講坐國泰有雪糕食，點知原來得果一條雪條，失望。

每個座位都有部衛星電話？只係個Remote Control

新片速遞

國泰嘅飛機餐真係麻麻地，個人覺得Air Macau果D好食過佢

坐左3個半鐘，終於到達吉隆坡機場。落左機先要坐返程無人架駛小火車去入境大樓，好彩冇咩國際航班，好快過左關，跟住攞埋行李就可以出去坐的士去酒店啦。

吉隆坡機場上空

落機之後

等緊坐無人架駛小火車去入境大樓

由機場去吉隆坡市區一般可以坐的士或者KLIA Express，坐KLIA要去到火車站再轉車去酒店，而且單程每人都要RM35，而坐的士只需要RM70左右，直接去到酒店門口，如果有兩個人或以上，當然係坐的士啦，既方便又省錢。

不過坐的士之前要去Budget Taxi櫃台度買飛，個counter就係攞完行李之後行去接機大堂嘅路上，埋到去話佢知你去邊，佢就會打張飛俾你同埋收埋車錢，因為路程唔同，所以唔同地方車費會唔同，不過市中心應該都係RM65~RM70之間。（註：而家馬來西亞幣對港幣匯率大約係2.3~2.4左右）

買完taxi飛照佢指示行去3號出口，跟住D人排隊上的士就可以啦。上車前會有工作人員問你攞張飛，因為張飛上面已經寫左你去嘅地方，所以全程唔洗同個司機講，又唔洗再俾錢，到站落車就可以，好方便又唔怕俾人屈。（我地行緊去3號出口等的士果陣，有個的類似的士佬嘅中國人埋黎問我地係唔係要坐的士去市區，我地話已經買左budget taxi，佢就好似嚇你咁話起碼要等一個鐘，其實budget taxi都好多，不停咁有車黎，所以唔洗排好耐就上到車，千其唔好幫襯D自己拉客嘅的士啊。）

排緊隊等上的士（註：前面個靚女我唔識架）